Tomiño leva a cabo importantes obras de acondicionamento no seu Mercado Municipal
O Concello de Tomiño vén de comezar novas obras no Mercado Municipal para o acondicionamento das súas instalacións, motivo que obrigará a pechar o primeiro andar da praza de abastos todas as tardes ata o vindeiro venres 17 de novembro. Estas obras non afectarán ao resto das instalacións na planta baixa, que manterá a súa actividade habitual.
Cun orzamento de 20.589,89 euros, as cobras contan cunha subvención de 10.294,95 euros da Consellería de Economía, Emprego e Industria concedida a través da Dirección Xeral de Comercio e Consumo da Xunta de Galicia ao abeiro da convocatoria de axudas para a consecución de mercados de excelencia nos distintos concellos galegos e para a mellora dos recintos onde se desenvolve o comercio non sedentario.
As obras, que comezaron este mesmo luns, contemplan o acondicionamento das instalacións da praza de abastos coa colocación dun pavimento técnico vinílico; a incorporación de elementos de redución do impacto da radiación solar, como un sistema de sombreado na zona de peixaría; a creación e acondicionamento dun espazo multifuncional para actividades que complementen a actividade comercial e a rotulación exterior do edificio.
Ademais, levaranse a cabo melloras no interiorismo axeitando as instalacións para acadar unha imaxe integral e homoxénea dos postos de venda e áreas comúns, así como na sinalización e na rotulación interior. Por outra banda, tamén se desenvolverán elementos de exposición de identificación de produtos e prezos.
Esta iniciativa conta ademais cunha partida de máis de 700 euros para desenvolver distintas actividades de formación dirixidas aos praceiros e praceiras que teñen os seus postos no Mercado Municipal.